"මරණ දඬුවම ලොව පුරා නීතියෙන් ම තහනම් කිරීම් සඳහා බල මුළු ගැන්වෙමු." සැප්තැම්බර මාසයේ සුදොතුම් පිය යැදුම් අදහස
"Let's mobilize for the abolition of the death penalty throughout the world" Pope invites people of good will through his prayer intention for September 2022
(2022 සැප්තැම්බර 7)
2022 සැප්තැම්බර් මාසය සඳහා ප්‍රැන්සිස් සුදොතුම් පියතුමා ගේ යැදුම් අදහස ඇතුළත් සසුන් පිය වීඩියෝව දැන් නිකුත් වී තිබේ.
ලොව පුරා සෑම රටකම නීත්‍යනුකුලව ම මරණ දඬුවම තහනම් කරවීම සඳහා බල මුළු ගැන්වෙන්නැයි ද ඒ වෙනුවෙන් දෙවිඳුන් යදින්නැයි එතුමා එම වීඩියෝ පණිවිඩය මගින් ලොව පුරා වෙසෙන යහපත් සිත් ඇති සියලු ජනතාවට ආරාධනා කරයි.
ප්‍රැන්සිස් සුදොතුම් පියතුමා සිය ජීවිතය පුරා ම මරණීය දණ්ඩනයට විරුද්ධව පෙනී සිටි කෙනෙකි. පාප් තුමන් ලෙස තේරී පත් වීමෙන් පසුව එතුමා මේ ගැන දිගින් දිගටම නොබියව ඉගැන්නුවේ ය. ඒ වෙනුවෙන් පෙනී සිටියේ ය.
කතෝලික සභාවේ ධර්මෝපදේශය ද සංශෝධනය කල එතුමා මරණ දඬුවම කතෝලික ඉගැන්වීමට පටහැනි බවත්, මේ නිසා එය නොපිළිගතහැකි දඬුවමක් බවත් දැක්වෙන නව වගන්තියක් ඊට එකතු කළේය. මෙම ඉගැන්වීම තව දුරටත් අවධාරණය කිරීම සඳහා ප්‍රැන්සිස් සුදොතුම් පියතුමා "සියල්ලෝ සොහොයුරෝ" නමැති සිය අලුත්ම විශ්ව ලේඛනයේ මරණ දඬුවමේ අමානුෂික, අධාර්මික සහ සදාචාර විරෝධී බව පෙන්වා දෙයි.
මරණීය දණ්ඩනය තහනම් කිරීම පිලිබඳ හඬ දුර්වල නොවී, අමතක නොවී පවත්වාගෙන යාම එතුමා ගේ දැඩි උත්සාහය වී තිබේ. එමගින් එම දඬුවම ඉක්මනින් නීති පොත්වලින් ඉවත් කිරීම එතුමන් ගේ අරමුණයි. එතුමා ඒ ගැන නිතර කතා කරන්නේ ඒ නිසාය. මේ මාසයේ යැදුම් අදහස ලෙස එය තෝරා ගැනීමේ හේතුව ද එයයි.
මරණ දඬුවම "එපා!"
මේ වන විට ලොව සෑම ප්‍රදේශයක ම මරණ දඬුවම "එපා" කියන හඬ වර්ධනය වෙමින් පවතින බව සිය වීඩියෝ පණිවිඩය ආරම්භ කරමින් එතුමා පෙන්වා දෙයි. එය එම දඬුවම පිටු දකින කතෝලික සභාවට බලාපොරොත්තුවේ සලකුණකි.
මරණ දඬුවම නොමැතිව වුව ද අපරාධ වැළක්විය හැකි බව එතුමා මේ වීඩියෝ පණිවිඩයේ පෙන්වා දෙයි. ඊට පරස්පරව, මරණීය දණ්ඩනය නිසා වින්දිතනයට යුක්තියක් ඉටු නොවේ. එය ධාර්මික ඉගැන්වීම් වලට මෙන් ම සදාචාරයට ද විරුද්ධය.
මේ නිසා එම දඬුවම තහනම් කිරීමට ඒකරාශී වන ලෙස ද එම යැදුම් අදහස වෙනුවෙන් යාච්ඥා කරන ලෙස ද ප්‍රැන්සිස් සුදොතුම් පියතුමා ලොව පුරා සිටින "යහපත් සිත් ඇති" සියලු ජනතාවට ආරාධනා කරයි.
අධිකරණයක් ඉදිරියේ ප්‍රකාශ කෙරෙන 'නීත්‍යනුකුල' නඩු තීන්දුවක් අනුව ලබා දෙන මරණ දඬුවම සේ ම නීතියෙන් පරිබාහිරව ජනපීඩක ආණ්ඩු විසින් සිදු කරන ඝාතන ද මීට ඇතුළත් වේ. වරදකරුවන් ලෙස සැකකෙරෙන පුද්ගලයන් නීතියෙන් පරිබාහිරව වුව ද ඝාතනය කිරීම මගින් එම අපරාධවල වින්දිතයනට හෝ පොදු සමාජයට හෝ යුක්තියක් ඉටු නොවේ. වරදකරුවනට වුව ද ජීවිතයට අයිතියක් ඇති අතර එය පැහැර ගත නොහැකි බව මේ වීඩියෝව මගින් ද සුදොතුම් පියතුමා පැහැදිලි කරයි.
සෑම මාසයක ම සසුන් පිය යැදුම් අදහස ඇතුලත් කර සසුන් පිය වීඩියෝව නිකුත් කරනු ලබන්නේ සසුන් පිය ලෝක ව්‍යාප්ත යැදුම් ජාලය විසිනි.
ලෝකයේ මරණ දඬුවම නීතියෙන් ක්‍රියාත්මක වන රටවල එම දඬුවම සඳහා තවමත් භාවිත කෙරෙන ක්‍රම සසුන් පිය වීඩියෝ දසුන් තුළින් ඉදිරිපත් කෙරේ. එහෙත් ඒවා නෙත් අබියසට ගෙන එනු ලබන්නේ එම දඬුවම් තුළ ආවේනික අමානුෂිකත්වය ද සමගය. මරණ දඬුවමට නියම වූවන් ගේ මානසික තත්වය චිත්‍රණය කෙරෙන කෙටි දසුන් කිහිපයක් ද ඊට ඇතුලත් වේ. සිර කුටියක පව් සමාවේ ප්‍රසාද නිධානය ලබා දෙන පියතුමකු ගේ දසුනක් ඊට ඇතුළත්ව ඇත්තේ ඕනෑම මොහොතක සිත් හැරීමට මිනිසාට ඇති හැකියාව චිත්‍රණය කරමිනි. ලොව පුරා මරණ දඬුවමට එරෙහිව නැගී එන විරෝධය දැක්වෙන දසුන් ද වීඩියෝවට ඇතුළත් ය,
Dear Saman kapila wijesuriya... congratulations for the wonderful piece of work... God bless
ReplyDelete